မြန်မာနိုင်ငံတွင် မွေးမြူရေးနှင့်စိုက်ပျိုးရေးကဏ္ဍကို ဟန်ချက်ညီဖွံ့ဖြိုးတိုးတက်စေရေး ကြိုးပမ်းဆောင်ရွက်လျက်ရှိရာ ပြည်တွင်းစားသုံးမှုနှင့် ပြည်ပပို့ကုန်အဖြစ် ရာသီမပြတ် မွေးမြူထုတ်လုပ်လျက်ရှိသည့် ရေချိုထွက်ကုန်များမှ ၂၀၂၄-၂၀၂၅ ဘဏ္ဍာနှစ်၌ ပြည်ပသို့ ရေချိုထွက်ကုန်တန်ချိန် ၅၅၀၀၀၀ ကျော်တင်ပို့မှုမှ အမေရိကန်ဒေါ်လာ ၇၂၂ သန်းကျော်ရရှိခဲ့ပြီး ၂၀၂၅-၂၀၂၆ ဘဏ္ဍာနှစ်၌ ဝင်ငွေတိုးမြှင့်ရရှိနိုင်ရေး ကြိုးပမ်းဆောင် ရွက်နေကြောင်း မြန်မာနိုင်ငံငါးလုပ်ငန်းအဖွဲ့ချုပ်မှ သိရသည်။
“ပို့ကုန်နှစ်ဆ တိုးမြှင့်ထုတ်လုပ်နိုင်ရန်အတွက် မွေးမြူရေးလုပ်ငန်းရှင်တွေ ကြိုးပမ်းဆောင်ရွက်ရာမှာ Value added လုပ်ဆောင်နိုင်ဖို့ လိုပါကြောင်း၊ သမားရိုးကျရောင်းချမှုကနေ ပြောင်းလဲလုပ်ဆောင်နိုင်ရန်အတွက် ရေထွက်ကုန်တွေကို မွေးမြူမှုနဲ့အတူ အသင့်စား ထုတ်လုပ်နိုင်မယ်ဆိုရင် ပို့ကုန်တန်ဖိုးတွေ မြင့်လာစေမည်ဖြစ်သည်။ ရေထွက်ကုန်တွေကို ready to eat ၊ ready to cook လုပ်ဆောင်နိုင်ခြင်းအားဖြင့် မွေးမြူသူနဲ့ ထုတ်လုပ်သူ အဆင်ပြေစေပြီး နိုင်ငံအတွက်လည်း ပြည်ပဝင်ငွေတိုးမြှင့် ရရှိနိုင်စေမည်ဖြစ်သည်။ ငါးမြစ်ချင်း၊ ငါးခေါင်းပွနဲ့ ငါးသလောက်ဆိုရင် ပြည်ပကို နှစ်စဉ်တင်ပို့လျက်ရှိပါကြောင်း၊ ၂၀၂၄-၂၀၂၅ ဘဏ္ဍာနှစ်တွင် ရေချိုထွက်ကုန် တင်ပို့မှုကနေ အမေရိကန်ဒေါ်လာ ၇၂၂ သန်းကျော်ရရှိခဲ့ပြီး ၂၀၂၅-၂၀၂၆ ဘဏ္ဍာနှစ်မှာ ပို့ကုန်တိုးမြှင့်ရရှိဖို့ ကြိုးပမ်းနေကြပါတယ်”ဟု မြန်မာနိုင်ငံငါးလုပ်ငန်းအဖွဲ့ချုပ်မှ သိရှိရသည်။
မြန်မာနိုင်ငံမှ အိန္ဒိယ၊ ဘင်္ဂလားဒေ့ရှ်၊ ဆော်ဒီအာရေးဗီးယားနှင့် အခြားသောနိုင်ငံအချို့သို့ ငါးမြစ်ချင်း၊ ငါးကြင်း၊ ငါးတန်၊ ငါးခေါင်းပွ၊ ငါးသလောက်နှင့် အခြားငါးမျိုးစုံတို့ကို အဓိကတင်ပို့လျက်ရှိပြီး ရေချိုထွက်ကုန်များကို ဧရာဝတီတိုင်းဒေသကြီး၊ ရန်ကုန်တိုင်းဒေသကြီးနှင့် ပဲခူးတိုင်းဒေသကြီးတို့၌ မွေးမြူထုတ်လုပ်လျက်ရှိပြီး တစ်ကန်ဖော်ချိန်၌ အခြားကန်များကို ဆက်လက်မွေးသောစနစ်ဖြင့် ငါးမွေးတောင်သူများ တစ်နှစ်ပတ် လုံး မွေးမြူထုတ်လုပ်လျက်ရှိသည်။
“ပြည်ပပို့ကုန်ဆိုရင် သူ့ဆိုဒ်နဲ့သူ၊ သူ့လိုင်းနဲ့သူ မွေးမြူတင်ပို့နေကြောင်း၊ လက်ရှိတွင် ငါးမြစ်ချင်းတစ်ကောင်ကို တစ်ပိဿာ သုံးဆယ်ကျပ်သားကနေ ခြောက်ပိဿာကျော်ခန့်၊ ငါးခေါင်းပွဆိုရင် ရှစ်ပိဿာကျော်ခန့် မွေးမြူပြီး တင်ပို့နေပါကြောင်း၊ ပို့ကုန်အတွက်ဆိုရင် အစာကျွေး မမှားစေရန် လိုအပ်ကြောင်း၊ တစ်ဧကကို သားပေါက်ကောင်ရေ ၇၀၀ ကနေ ၁၀၀၀ အထိမွေးပါတယ်။ ငါးစုံဆိုရင် ၁၂၀၀ အထိ မွေးပါတယ်။ ဗီယက်နမ်မွေးမြူမှုနဲ့မတူပါဘူး။ ငါးဆိုဒ်ကြီး မွေးမြူတာဖြစ်တဲ့အတွက် ဂရုစိုက်ရပါတယ်။ အခုရက်ပိုင်းငါးဈေးကောင်းတယ်၊ ပြည်တွင်းမှာလည်းကောင်းပြီး ပြည်ပပို့ကုန်မှာလည်းကောင်းပါတယ်။ မနှစ်က ငါးကန်တွေ ရေမြုပ်တာကြုံခဲ့ရတော့ ဒီနှစ် မိုးရာသီမှာလည်း ဂရုစိုက်နေရပါကြောင်း၊ ပြည်တွင်းစားသုံးမှု ဖူလုံပြီး ပြည်ပပို့ကုန်မှာလည်း နိုင်ငံခြားငွေရတဲ့အတွက် ပိုပြီးဂရုစိုက်ရပါကြောင်း၊ အစာဈေးနှုန်း အခက်အခဲရှိပေမယ့် ပိုမိုထုတ်လုပ်မွေးမြူနိုင်ဖို့ နည်းလမ်းအမျိုးမျိုးနဲ့ ကြိုးစားနေကြပါတယ်” ဟု ဧရာဝတီတိုင်းဒေသကြီး ညောင်တုန်းမြို့မှ ငါးမွေးမြူရေး လုပ်ငန်းရှင်ထံမှ သိရှိရသည်။
ပင်လယ်ပြင်ငါးဖမ်းရာသီ ပိတ်သိမ်းထားချိန်တွင် ငါးဈေးကွက်၌ ရေချိုထွက်ကုန်များ အရောင်းအဝယ်ကောင်းလျက်ရှိသည်။ မွေးမြူရေးကဏ္ဍတွင် နိုင်ငံတကာ၌ ကောင်းမွန်သော မွေးမြူရေး ကျင့်စဉ်မှ အကောင်းဆုံး မွေးမြူရေးကျင့်စဉ်သို့ ပြောင်းလဲအသုံးပြုလျက်ရှိရာ မြန်မာနိုင်ငံတွင်လည်း မျိုးကောင်းမျိုးသန့်များ မွေးမြူ ထုတ်လုပ်နိုင်ရန်နှင့် ဒေသမျိုးရင်းများကို ထိန်းသိမ်းနိုင်ရန် ငါးလုပ်ငန်းဦးစီးဌာနနှင့် မြန်မာနိုင်ငံငါးလုပ်ငန်း အဖွဲ့တို့ ကြိုးပမ်းဆောင်ရွက်လျက်ရှိကြောင်း သိရှိရသည်။
source: https://www.myawady.net.mm
